|
Anne-Mari Gavin skryf: Ek het al in die verlede reageer op die wreedheid van die mens teenoor diere, veral die mense wat oorlog verklaar het teen die dorp se ape.
Spesifiek vir die inwoner van West Acres wat sy/haar clivias meer belangrik ag as die lewe van 'n dier wat deur God geskape is.
Graag wil ek net vir al hierdie mense sê wat dink lewe kom net hulle toe: besef julle dat julle eintlik die woongebied van die ape oorgeneem het? En nie een keer was daar aan die diertjies wat daar woon se welsyn gedink nie. Nie net die ape nie, ook eekhorings, nagapies, rotte, muise, slange, koggelmanders en talle ander kleiner diere ook. Die mens is die mees selfsugtigste kreatuur wat God ooit geskape het! Geen wonder Hy was spyt nadat Hy hulle klaar geskape het nie. Gen 6:5 sê: "Toe die Here sien dat die boosheid van die mens op die aarde groot was en al die versinsels wat hy in sy hart bedink, altyddeur net sleg was, het dit die Here berou dat Hy die mens op die aarde gemaak het, en daar was smart in Sy hart."
Mense plant voort en stuur hulle kinders die wêreld in om vir hulself 'n nessie iewers op te eis, maar besef nie dat diere presies dieselfde doen nie. Nou word die diere se woonplekke opgeëis deur die mense, so waar moet hulle dan heen gaan?
Sommer net so goedsmoeds word dit sonder om te blik of te bloos gesê, "gee hulle gif, maak hulle dood - want ons wil hier bly!" Wie gee julle die reg om goedsmoeds te moor wat God eerste geskape het? Geen wonder die diere moet veg vir oorlewing, sou julle nie ook terug geveg het as julle in 'n hoek gedruk word nie?
Kom ons waardeer liewer alles wat God geskape het. Op hierdie aarde is daar vir ons almal 'n plek as ons leer om in harmonie saam te leef. Bestudeer liewer diere se gedrag en verstaan hoekom hulle doen wat hulle doen. Hulle sal jou altyd iets kan leer, want God het hulle meer insig oor Sy groot plan gegee as vir die mens met sy menslike wil. Sien gerus Job 5:23: "Want met die klippe van die veld is jou verbond, en die wilde diere van die veld is met jou bevriend. Job 12:7: "Maar vra tog vir die diere, dat hulle jou leer; en die voëls van die hemel, dat hulle jou te kenne gee"; die ou spreekwoord sê, "Sien leef en laat leef!"
Jak 3:16: "want waar afguns en selfsug is, daar is wanorde en allerhande gemene dade." Ek wil graag hierdie gedagte by almal laat - Kol 3:25: "maar wie onreg doen, sal die onreg wat hy gedoen het, terug ontvang." Leer ons dan nie ons kinders dat respek wel respek afdwing nie? En respek meen vir jouself, vir ander en alles wat God geskape het.
|
